दाङ :- दाङमा करिब एक महिनाको अवधिमा १३ सय बढी मतदाता थपिएका छन् । गत असोज १२ गतेदेखि दर्ता तथा अद्यावधिक सुरु भएको दाङमा कात्तिकको १७ गते सोमवारसम्म एक हजार तीन सय चार जना नागरिकले मतदाता नामावलीमा आफ्नो नाम दर्ता गराएका हुन् ।
जिल्लामा असोजको १२ गतेदेखि कात्तिकको १७ गतेसम्म आठ सय ३३ जना पुरुष र चार सय ७१ जना नयाँ मतदाता थपिएको प्रदेश निर्वाचन कार्यालय दाङका सूचना अधिकारी गेहेन्द्र कुवँरले जानकारी दिनुभएको छ ।
सूचना अधिकारी कुवँरका अनुसार यो अवधिमा जिल्लामा सबैभन्दा धेरै घोराही उपमहानगरपालिकामा पाँच सय ५९ जना, तुलसीपुर उपमहानगरपालिकामा तीन सय ७५ जना, लमही नगरपालिकामा ७७ जना, राप्ती गाउँपालिकामा ५५ जना, गढवा गाउँपालिकामा ३९ जना, बंगलाचुली र शान्तिनगर गाउँपालिकामा २९÷२९ जना, दंगीशरण गाउँपालिकामा २७ जना, बबई गाउँपालिकामा १९ जना र राजपुर गाउँपालिकामा सात जना नयाँ मतदाता थपिएका छन् ।
त्यसै गरी यस अवधिमा एक सय ८३ जनाले नामसारी गरेका छन् भने ८६ जनाले मतदाता नामावलीमा रहेको त्रुटि सच्याएका छन् ।
कार्यालयका सूचना अधिकारी कवँरका अनुसार नयाँ मतदाता नामावली दर्ता गराउनका लागि थप एक हजार १२ जनाले अनलाइनबाट अग्रिम फारम भरेको तर बायोमेट्रिकका लागि कार्यालयमा अझै आई नपुगेको बताउनुभयो ।
आगामी फागुन २१ गते हुने निर्वाचनमा आफ्नो भोटिङ अधिकार प्राप्त गर्नका लागि अपेक्षा गरे अनुसार जिल्लामा मतदाता नामावली दर्ताका लागि नआएको सूचना अधिकारी कवँरले बताउनुभयो ।
मतदाता नामावलीमा नयाँ नाम दर्ता र अद्यावधिक बारे जिल्लामा प्रचारप्रसार नहुँदा अत्यन्त न्यून मात्रामा मतदाता नामावली सङ्कलनको कार्य भइरहेको बताउनुभयो ।
तपाईको प्रतिक्रिया
सम्बन्धित खवर
